פרק קכד

א שִׁיר הַמַּעֲלוֹת לְדָוִד לוּלֵי יְהוָׁה שֶׁהָיָה לָנוּ יֹאמַר־נָא יִשְׂרָאֵל;
ב לוּלֵי יְהוָׁה שֶׁהָיָה לָנוּ בְּקוּם עָלֵינוּ אָדָם;
ג אֲזַי חַיִּים בְּלָעוּנוּ בַּחֲרוֹת אַפָּם בָּנוּ;
ד אֲזַי הַמַּיִם שְׁטָפוּנוּ נַחְלָה עָבַר עַל־נַפְשֵׁנוּ;
ה אֲזַי עָבַר עַל־נַפְשֵׁנוּ הַמַּיִם הַזֵּידוֹנִים;
ו בָּרוּךְ יְהוָׁה שֶׁלֹּא נְתָנָנוּ טֶרֶף לְשִׁנֵּיהֶם;
ז נַפְשֵׁנוּ כְּצִפּוֹר נִמְלְטָה מִפַּח יוֹקְשִׁים הַפַּח נִשְׁבָּר וַאֲנַחְנוּ נִמְלָטְנוּ;
ח עֶזְרֵנוּ בְּשֵׁם יְהוָׁה עֹשֵׂה שָׁמַיִם וָאָרֶץ;