פרק קכה

א שִׁיר הַמַּעֲלוֹת הַבֹּטְחִים בַּיהוָׁה כְּהַר־צִיּוֹן לֹא־יִמּוֹט לְעוֹלָם יֵשֵׁב;
ב יְרוּשָׁלַם הָרִים סָבִיב לָהּ וַיהוָׁה סָבִיב לְעַמּוֹ מֵעַתָּה וְעַד־עוֹלָם;
ג כִּי לֹא יָנוּחַ שֵׁבֶט הָרֶשַׁע עַל גּוֹרַל הַצַּדִּיקִים לְמַעַן לֹא־יִשְׁלְחוּ הַצַּדִּיקִים בְּעַוְלָתָה יְדֵיהֶם;
ד הֵיטִיבָה יְהוָׁה לַטּוֹבִים וְלִישָׁרִים בְּלִבּוֹתָם;
ה וְהַמַּטִּים עַקַלְקַלּוֹתָם יוֹלִיכֵם יְהוָׁה אֶת־פֹּעֲלֵי הָאָוֶן שָׁלוֹם עַל־יִשְׂרָאֵל;