פרק קמ
א לַמְנַצֵּחַ מִזְמוֹר לְדָוִד;
ב חַלְּצֵנִי יְהוָׁה מֵאָדָם רָע מֵאִישׁ חֲמָסִים תִּנְצְרֵנִי;
ג אֲשֶׁר חָשְׁבוּ רָעוֹת בְּלֵב כָּל־יוֹם יָגוּרוּ מִלְחָמוֹת;
ד שָׁנֲנוּ לְשׁוֹנָם כְּמוֹ־נָחָשׁ חֲמַת עַכְשׁוּב תַּחַת שְׂפָתֵימוֹ סֶלָה;
ה שָׁמְרֵנִי יְהוָׁה | מִידֵי רָשָׁע מֵאִישׁ חֲמָסִים תִּנְצְרֵנִי אֲשֶׁר חָשְׁבוּ לִדְחוֹת פְּעָמָי;
ו טָמְנוּ גֵאִים | פַּח־לִי וַחֲבָלִים פָּרְשׂוּ רֶשֶׁת לְיַד מַעְגָּל מֹקְשִׁים שָׁתוּ־לִי סֶלָה;
ז אָמַרְתִּי לַיהוָׁה אֵלִי אָתָּה הַאֲזִינָה יְהוָׁה קוֹל תַּחֲנוּנָי;
ח יֱהוִׁה אֲדֹנָי עֹז יְשׁוּעָתִי סַכּוֹתָה לְרֹאשִׁי בְּיוֹם נָשֶׁק;
ט אַל־תִּתֵּן יְהוָׁה מַאֲוַיֵּי רָשָׁע זְמָמוֹ אַל־תָּפֵק יָרוּמוּ סֶלָה;
י רֹאשׁ מְסִבָּי עֲמַל שְׂפָתֵימוֹ יְכַסֵּומוֹ יְכַסֵּמוֹ;
יא יִמֹּיטוּ יִמּוֹטוּ עֲלֵיהֶם גֶּחָלִים בָּאֵשׁ יַפִּלֵם בְּמַהֲמֹרוֹת בַּל־יָקוּמוּ;
יב אִישׁ לָשׁוֹן בַּל־יִכּוֹן בָּאָרֶץ אִישׁ־חָמָס רָע יְצוּדֶנּוּ לְמַדְחֵפֹת;
יג יָדַעְתִּ יָדַעְתִּי כִּי־יַעֲשֶׂה יְהוָׁה דִּין עָנִי מִשְׁפַּט אֶבְיֹנִים;
יד אַךְ צַדִּיקִים יוֹדוּ לִשְׁמֶךָ יֵשְׁבוּ יְשָׁרִים אֶת־פָּנֶיךָ;