פרק טו
א מִזְמוֹר לְדָוִד יְהוָׁה מִי־יָגוּר בְּאָהֳלֶךָ מִי־יִשְׁכֹּן בְּהַר קָדְשֶׁךָ
;
ב הוֹלֵךְ תָּמִים וּפֹעֵל צֶדֶק וְדֹבֵר אֱמֶת בִּלְבָבוֹ
;
ג לֹא־רָגַל | עַל־לְשֹׁנוֹ לֹא־עָשָׂה לְרֵעֵהוּ רָעָה וְחֶרְפָּה לֹא־נָשָׂא עַל־קְרֹבוֹ
;
ד נִבְזֶה | בְּעֵינָיו נִמְאָס וְאֶת־יִרְאֵי יְהוָׁה יְכַבֵּד נִשְׁבַּע לְהָרַע וְלֹא יָמֹר
;
ה כַּסְפּוֹ | לֹא־נָתַן בְּנֶשֶׁךְ וְשֹׁחַד עַל־נָקִי לֹא־לָקָח עֹשֵׂה אֵלֶּה לֹא יִמּוֹט לְעוֹלָם
;