פרק כד

א לְדָוִד מִזְמוֹר לַיהוָׁה הָאָרֶץ וּמְלוֹאָהּ תֵּבֵל וְישְׁבֵי בָהּ;
ב כִּי הוּא עַל־יַמִּים יְסָדָהּ וְעַל־נְהָרוֹת יְכוֹנְנֶהָ;
ג מִי־יַעֲלֶה בְהַר יְהוָׁה וּמִי־יָקוּם בִּמְקוֹם קָדְשׁוֹ;
ד נְקִי כַפַּיִם וּבַר לֵבָב אֲשֶׁר לֹא־נָשָׂא לַשָּׁוְא נַפְשִׁי וְלֹא נִשְׁבַּע לְמִרְמָה;
ה יִשָּׂא בְרָכָה מֵאֵת יְהוָׁה וּצְדָקָה מֵאֱלֹהֵי יִשְׁעוֹ;
ו זֶה דּוֹר דֹּרְשָׁו דֹּרְשָׁיו מְבַקְשֵׁי פָנֶיךָ יַעֲקֹב סֶלָה;
ז שְׂאוּ שְׁעָרִים | רָאשֵׁיכֶם וְהִנָּשְׂאוּ פִּתְחֵי עוֹלָם וְיָבוֹא מֶלֶךְ הַכָּבוֹד;
ח מִי זֶה מֶלֶךְ הַכָּבוֹד יְהוָׁה עִזּוּז וְגִבּוֹר יְהוָׁה גִּבּוֹר מִלְחָמָה;
ט שְׂאוּ שְׁעָרִים | רָאשֵׁיכֶם וּשְׂאוּ פִּתְחֵי עוֹלָם וְיָבֹא מֶלֶךְ הַכָּבוֹד;
י מִי הוּא זֶה מֶלֶךְ הַכָּבוֹד יְהוָׁה צְבָאוֹת הוּא מֶלֶךְ הַכָּבוֹד סֶלָה;