פרק ג

א מִזְמוֹר לְדָוִד בְּבָרְחוֹ מִפְּנֵי | אַבְשָׁלוֹם בְּנוֹ;
ב יְהוָׁה מָה־רַבּוּ צָרָי רַבִּים קָמִים עָלָי;
ג רַבִּים אֹמְרִים לְנַפְשִׁי אֵין יְשׁוּעָתָה לּוֹ בֵאלֹהִים סֶלָה;
ד וְאַתָּה יְהוָׁה מָגֵן בַּעֲדִי כְּבוֹדִי וּמֵרִים רֹאשִׁי;
ה קוֹלִי אֶל־יְהוָׁה אֶקְרָא וַיַּעֲנֵנִי מֵהַר קָדְשׁוֹ סֶלָה;
ו אֲנִי שָׁכַבְתִּי וָאִישָׁנָה הֱקִיצוֹתִי כִּי יְהוָׁה יִסְמְכֵנִי;
ז לֹא־אִירָא מֵרִבְבוֹת עָם אֲשֶׁר סָבִיב שָׁתוּ עָלָי;
ח קוּמָה יְהוָׁה | הוֹשִׁיעֵנִי אֱלֹהַי כִּי־הִכִּיתָ אֶת־כָּל־אֹיְבַי לֶחִי שִׁנֵּי רְשָׁעִים שִׁבַּרְתָּ;
ט לַיהוָׁה הַיְשׁוּעָה עַל־עַמְּךָ בִרְכָתֶךָ סֶּלָה;