פרק ו
א לַמְנַצֵּחַ בִּנְגִינוֹת עַל־הַשְּׁמִינִית מִזְמוֹר לְדָוִד
;
ב יְהוָה אַל־בְּאַפְּךָ תוֹכִיחֵנִי וְאַל־בַּחֲמָתְךָ תְיַסְּרֵנִי
;
ג חָנֵּנִי יְהוָׁה כִּי אֻמְלַל אָנִי רְפָאֵנִי יְהוָׁה כִּי נִבְהֲלוּ עֲצָמָי
;
ד וְנַפְשִׁי נִבְהֲלָה מְאֹד וְאַתָּה יְהוָׁה עַד־מָתָי
;
ה שׁוּבָה יְהוָׁה חַלְּצָה נַפְשִׁי הוֹשִׁיעֵנִי לְמַעַן חַסְדֶּךָ
;
ו כִּי אֵין בַּמָּוֶת זִכְרֶךָ בִּשְׁאוֹל מִי יוֹדֶה־לָּךְ
;
ז יָגַעְתִּי בְּאַנְחָתִי אַשְׂחֶה בְכָל־לַיְלָה מִטָּתִי בְּדִמְעָתִי עַרְשִׂי אַמְסֶה
;
ח עָשְׁשָׁה מִכַּעַס עֵינִי עָתְקָה בְּכָל־צוֹרְרָי
;
ט סוּרוּ מִמֶּנִּי כָּל־פֹּעֲלֵי אָוֶן כִּי־שָׁמַע יְהוָׁה קוֹל בִּכְיִי
;
י שָׁמַע יְהוָׁה תְּחִנָּתִי יְהוָׁה תְּפִלָּתִי יִקָּח
;
יא יֵבשׁוּ וְיִבָּהֲלוּ מְאֹד כָּל־אֹיְבָי יָשֻׁבוּ יֵבשׁוּ רָגַע
;